حكاية سوزان

طبعا كنت بترفض كل مقدم في شغل.. لحد ملقيت شغلانه حلوه جدا ومناسبه لظروفي اشتغلت في كافيه اقف في المطبخ اغسل الصحون.. اهو هقف في المطبخ طول الوقت مش هتعامل مع حد من الزباين

كنت بغير من البنات الي بيشتغلو في الكافيه.. كانو بنات حلوين وشعرهم جميل ووشهم صافي.. كانو بيقدمو الطلبات للزباين

وطبعا انا مستحيل اشتغل الشغلانه دي 

كنت بساعد امي في شغل البيت لما ارجع من شغلي… 

وعرفت بعد فتره اشتري تليفون لنفسي اتسلي واشغل وقتي بيه.. واعيش الواقع الافتراضي الي مش قادره اعيشه في الحقيقه..

عملت حساب علي الفيس بوك بشخصيه وهميه غير شخصيتي…وتزلت كل الفلاتر والبرامج الي بتنقي الصور وتخفي اثار الحبوب من وشي.. واشتغلت علي صوري وعملت مونتاج واخفيت الحبوب تماما

ودي بقت حياتي.. عايشه بوش في مواقع التواصل الاجتماعي وبوش تاني خالص في الواقع المر الي انا عيشاه

بعد فتره لقيت حد باعت لي طلب صداقه .. دخلت علي الحساب بتاعه ولفيت في صوره

عجبني وقبلت الصداقه.. وبدانا نتكلم انا وهو…فضلنا نتكلم فتره .. حكي لي عن نفسه وحكيت له عن نفسي وقربنا من بعض 

وفي مره قال لي انا عايز اشوف شكلك وتشوفي شكلي .. انا هبعت لك صورتي وانتي ابعتي لي صورتك لانك مش منزله صور علي الصفحه بتاعتك خالص.. وقتها ومن غير اي تردد اخترت اجمل صوره ليا لاعبه عليها في الفلاتر والمونتاج وبعتها له فورا..اول مشافها انبهر وقال لي الله انتي جميله اوي.. انا محظوظ اني اتعرفت علي واحده حلوه زيك.. طبعا فرحت جدا بكلامه

كنت محتاجه اسمع كلام حلو رغم ان انا عارفه ان مش ده الواقع وانه مشافش شكلي الطبيعي.. 

مع الوقت علاقتنا بدات تتطور وقربنا من بعض اكتر وبقينا كل يوم نبعت لبعض صور

.. طبعا جهزت صور كتير ليا في الشغل وفي البيت وفي الخروجات .. وعملت لها مونتاج وفلاتر علشان لما يطلب مني صوره ابعتها له علي طول كاني لسه متصوراها دلوقتي علي الطبيعه

اتعلقت بيه جدا بطريقه فظيعه وبقي كل حاجه في حياتي .. حبيته وهو كمان حبني

هو كان عايش في محافظه بعيده جدا عن محافظتي.. وكان صعب يجي ويشوفني

من كتر ما حبيته بقيت عايشه بتمني اشوفه وبحلم باليوم الي هكون معاه وجها لوجه.. وقولت هو اكيد علشان بيحبني مش هيفرق معاه شكلي لما يشوفني بالحبوب الي في وشي دي.. اكيد هو دلوقتي بيحبني لشخصي وطباعي مش لصوري ولا شكلي