حكاية سوزان

حكايه سوزان كامله

انا اسمي (سوزان) فتحت عينيا علي الدنيا لقيتني عايشه مع امي في بيت جدتي علشان امي وابويا اطلقو من وانا عندي سنه 

عيلتنا فقيره.. وامي هي الي متكفله بيا وبمصاريفي بعد ما ابويا طلقها واتخلي عنا وسابنا.. ولا كان بيسال عليا ولا بيبعت لي فلوس ولا يعرف عني حاجه.. امي الي كانت متوليه كل حاجه.. كانت بتشتغل في البيوت علشان تقدر تجيب فلوس تصرف عليا وعلي جدتي العيانه

جدتي ست كبيره ومش بتقدر تقوم من السرير وانا كنت اغلب الوقت براعيها واخدمها لان امي طول الوقت بره البيت بتشتغل

اول ماخدت الاعداديه قررت ابطل دراسه واقعد في البيت .. هقول لكم السبب.. السبب اني لما وصلت للسن ده حصلت تغيرات في جسمي زي اي بنت ولكن بعض البنات بيطلع لهم حبوب في وشهم بسبب تغير الهرمونات .. انا كنت من البنات دي.. في الوقت ده وشي اتملا حبوب بطريقه واضحه جدا ومكانش معايا فلوس اروح للدكتور او اجيب علاج للحبوب دي.. وبصراحه بقيت بتكسف من شكلي بالحبوب الي في وشي دي.. ولما كنت بسال علي العلاج كنت بلاقي سعره غالي جدا..حاولت اجيب وصفات طبيعيه من علي النت من مكونات موجوده في البيت وفعلا عملتها بس مجابتش نتيجه.. كرهت نفسي .. بقيت احلم انام واصحي الاقي وشي بقي صافي مفيهوش ولا حبايه.. بس للاسف الحاجات دي عايزه فلوس ودكاتره ومتابعه وقت طويل ومصاريف .. بس للاسف احنا مكانش معانا فلوس لكل ده .. وده السبب الي خلاني اسيب المدرسه ومكملش دراستي

كنت حاسه ان البنات بيقرفو من شكل وشي .. مفيش ولا واحده راضيه تصاحبني

وحتي المدرسين كانو بيبعدو عني

المهم فاتت سنه والحال زي ماهو ..

 ماما كانت بتقول لي انا كنت زيك كده واول ما تكبري شويه تبقيد١٧او ١٨ سنه الموضوع هيروح وهتلاقي وشك بقي صافي وهتلاقي الحبوب دي راحت خالص

كنت بقول لها هو انا لسه هستنا كام سنه بوشي بالشكل ده؟.. انا محتاجه دكتور.. بس برجع افتكر حالنا ان احنا يادوب بنعرف نجيب اللقمه الي بناكلها.. ده احنا اوقات نتغدي ومنتعشاش وارقات نتعشا ومنلاقيش نفطر.. حتي علاج جدتي ماما بتستلف من طوب الارض علشان تكمل علي فلوس العلاج

بعد فتره قررت اتغلب علي حالتي وانزل ادور علي شغل وفكرت بيني وبين نفسي انا مليش ذنب في الحبوب الي في وشي وان الي عايزني وبيحبني هيتقبل شكلي زي مانا