حكاية امل وفارس

الفصل الأول رواية الكاتبة ملك إبراهيم "صحبتها في الجامعة تعبت ونقلوها المستشفى.. أمل راحت تطمن عليها هي ومجموعة بنات زمايلها. البنات كانوا مبهورين من المستشفى الفاخمة. دخلوا أوضة دنيا صحبتهم وهما لسه مبهورين. واحدة من البنات قعدت جنب دنيا على السرير وسألتها: "المستشفى دي شكلها غاليه اوي يا دنيا.. انتي هتطلعي من عيلة غنيا ولا ايه؟" دنيا اتوترت لأنها كانت مخبيه عن اصحابها في الجامعة انها من عيلة "الحريري" وتبقى اخت "فارس الحريري" اكبر واشهر رجل اعمال. أمل بصت لـ دنيا وحست انها مخبيه حاجة.. هما كلهم من الطبقة البسيطة.. وكانوا فاكرين ان دنيا من أسرة بسيطة زيهم. فجأة الباب بيتفتح وتدخل الممرضه وتقول بحماس: "باشمهندس فارس وصل ودخل مكتب مدير المستشفى .. الدكتور هيكتب لحضرتك علي خروج دلوقتي" وطلبت من البنات يخرجوا خمس دقايق عشان دنيا تاخد باقي علاجها قبل ما تخرج. البنات خرجوا وهما مستغربين. وأمل كانت حاسه ان دنيا مخبيه حاجة.. واكتر من مرة كانت دنيا بتحاول تقولها وتتراجع قبل ما لسانها ينطق. فجأة دخل "فارس الحريري" المستشفى بثقة وخطوات ثابتة، كأن المكان كله ملكه. كان لابس بدلة غالية.. وسيم لدرجة تخطف القلب، وكل خطوة منه كانت بتفرض حضوره على المكان من غير ما ينطق بكلمة. هيبة طاغية وغرور بارد كانوا محاوطينه، خلت كل العيون تتشد ناحيته تلقائيًا. وراه مدير المستشفى بيجري تقريبًا علشان يلحقه، بيتكلم معاه باحترام واضح: "اتفضل يا باشمهندس فارس .." كل البنات شهقت وبرقت وعيونهم لمعت، وهمسهم بقى عالي: "ده فارس الحريري بجد؟ رجل الأعمال اللي بيطلع في التليفزيون؟" أمل أول ما شافته خفضت وشها في الأرض بسرعة، حست إنها مش قادرة تبص في عينيه.. و بتهمس جواها : إيه الهيبة دي كلها؟ ده داخل كأنه صاحب المستشفى. وهو ولا شايف حد، ولا سامع همس حد، عينيه مركزة على باب واحد بس، دخل أوضة أخته بسرعة وقفلوا الباب وراه. البنات برا ما صدقوا، اتلموا على بعض وبيتكلموا وهما مبهورين: "ده قمر أوي على الحقيقة.. بس هو إيه علاقته بـ دنيا" واحدة تانيه من البنات قالت: "ده أنا متابعة كل اخباره على الانستجرام.. تصدقوا احنا اغبيه اوي.. هو فارس الحريري.. وهي دنيا الحريري.." البنات شهقوا بصدمة: "يعني دنيا اخت القمر دا ومخبيه علينا" أمل واقفة ساكتة مش فاهمة مين فارس الحريري ده أصلاً، وليه كل البنات مهتمين ب أخباره كدا! لحد ما واحدة من البنات قالت: "ده كان خاطب بنت سفير على فكرة!" وواحدة تانية ردت عليها بسرعة: "لا لا ده كان خاطب بنت أغنى رجل أعمال في البلد، بس سابها عشان خانته!" أمل حست فجأة إنها صغيرة أوي، بعيدة أوي عن العالم اللي بيتكلموا عنه ده، عالم الفلوس والعلاقات والشهرة. هي يا دوب بنت بسيطة عايشة في حارة ضيقة مع أمها، وأبوها ميت من وهي لسه عيلة صغيرة، مالهاش في جو الأغنياء ده خالص، وجواها بتهمس لنفسها: وأنا إيه اللي جابني وسط دول؟ بعد كام دقيقة باب الأوضة اتفتح وخرجت دنيا وهي سانده على دراع أخوها، وشها لسه أصفر بس بتضحك، والدكتور بيطمن فارس: "ما تقلقش يا فارس بيه، أخت حضرتك بقت كويسه الحمدلله.. وانا هاجي بنفسي اتابع حالتها في البيت" فارس هز راسه وشكر الدكتور ووقف يتكلم معاه. كل البنات جريوا على دنيا يسألوها مين دا؟ دنيا قالت لهم الحقيقه.. ان فارس يبقى اخوها الكبير وهي كانت مخبيه عشان مش عايزه حد يعرف وعايزه تبقي معتمدة على نفسها بعيد عن اسم اخوها ونجاحه البنات كلهم كانت عيونهم على فارس، عايزين يكلموه ويتعرفوا عليه، إلا واحدة بس اللي فضلت واقفة بعيد. هي أمل.. كانت زعلانه من دنيا عشان خبت عليها وهي كانت بتعتبرها اقرب صاحبه ليها في الجامعة. فارس لمح أمل بطرف عينه، استغرب، بنت واقفة لوحدها، لا قربت ولا حاولت تلفت نظره زي الباقين، حتى مش بتبص عليه، وده خلاه يركز معاها أكتر، جواه بيقول: مين دي اللي مش مهتمة؟ كلهم بيتخانقوا عشان كلمة مني وهي ولا هنا. دنيا سابت البنات وقربت من أمل وخدتها بالحضن: "انا اسفه يا أمل عشان خبيت عليكي.. بس اوعدك اني هحكيلك كل حاجة في الوقت المناسب وهقولك ليه عملت كدا" أمل ردت بهدوء: "المهم انك بخير يا دنيا.. الحمدلله انك قومتي بالسلامة، خلي بالك من نفسك وابقي طمنيني عليكي" ، وقالت كلمتين ومشيت بسرعة لأنها كانت زعلانه من دنيا بجد. فارس ودنيا خرجوا من المستشفى وركبوا العربية، طول الطريق ساكت وبعدين سألها فجأة: "مين البنت اللي سلمتي عليها ومشيت بسرعة دي؟" دنيا ضحكت وقالتله: "دي أمل، أقرب صاحبة ليا في الجامعة، شاطرة أوي وطيبة، عايشة هي ومامتها لوحدهم وظروفهم على قدها أوي" فارس بص قدامه وابتسم ابتسامة هادية، افتكر وقفتها البعيدة وكسوفها.. وقال بهدوء: "عشان كده أنا أصريت أدخلك الجامعة دي وما دخلتكيش جامعة خاصة، عشان تعرفي إن الدنيا صعبة على ناس كتير ولازم تتعبي عشان توصلي" دنيا بصتله بحب، هو مش مجرد أخوها الكبير، هو أبوها وسندها: "حاضر يا فارس، أنا هخليك دايماً فخور بيا إن شاء الله" وفي نفس الوقت كانت أمل راجعة الحارة، ماشية وراسها في الأرض وبتفكر في اليوم الطويل، لحد ما مرة واحدة لقت اللي واقف في نص الشارع وسادد عليها الطريق. عباس، بلطجي الحارة اللي عينه منها من زمان، بيضايقها في الرايحة والجاية وعايز يتجوزها، واقف وبيبصلها بنظرة تخوف: "إيه يا حلوة، راجعة متأخر كده ليه؟" أمل وقفت في مكانها وجسمها كله بيترعش من الغضب والقرف، رفعت عينيها فيه وبصتله بحدة، بتكره نظرته وزهقت من وقفته اللي حافظاها كل يوم: "انت مالك بيا.. قولتلك 100 مرة متقفش في طريقي" عباس ضحك ضحكة سمجة كلها سخرية، قرب خطوة وهي رجعت خطوة، باصصلها من فوق لتحت كأنه ضامنها: "مقدرش يا جميل.. بس انتي لو توافقي.. انا كنت اخليكي ملكة الحارة دي كلها" الكلمة نزلت عليها كأنها إهانة، معقول بعد التعب دا كله هتتجوز بلطجي ، وكل أحلامها في الهندسة والجامعة ولا حاجة قدامه، اتغاظت من جواها وقالت بعصبية وصوتها عالي: "شكلك مجنون ومحتاج تتعالج صدقني" قالتها ومشيت وسابته واقف، وهو وراها بيعلي صوته ببجاحة عشان الحارة كلها تسمع تهديده: "بكره تيجي لحد عندي يا جميل" دخلت أمل شقتهم البسيطة، شقة صغيرة على قد الحال ريحتها جميلة وهواها دافي، قفلت الباب وراها جامد وهي مضايقة ومتعصبة وروحها طالعة من عباس وقرفه، قلبها بيدق بعنف من كتر الغيظ. مامتها كانت قاعدة على الكنبة، ست طيبة ووشها تعبان من المرض، أول ما شافت وش بنتها المقلوب قامت قلقانة: "مالك يا أمل يا بنتي؟ عباس تاني؟" أمل رمت الشنطة وقعدت جنبها وهي بتحاول تكتم دموعها عشان ما تقلقهاش: "اه هو يا ماما، كل يوم نفس القرف" أمها طبطبت عليها بإيد ضعيفة وبتحاول تهديها بكلمتين هي حافظاهم من كتر ما بتقولهم، عشان هي عارفة بنتها بتتعرض لإيه كل يوم في المنطقة هنا: "معلش يا بنتي استحملي، الناس هنا كده وربنا يبعده عنك" أمل مسكت إيد أمها وباستها، وبلعت غضبها جواها عشان تخفف الهم عن والدتها، رسمت ضحكة صغيرة بالعافية: "متقلقيش عليا يا ماما، انا بعرف اتصرف معاهم" قامت بسرعة دخلت المطبخ الصغير تجهز الأكل، إيديها بتشتغل بسرعة ودماغها مشغولة، جواها بتقول لنفسها: لازم أخلص الاكل لـ ماما بسرعة عشان ألحق شغلي في الكافيه ، مفيش وقت للعياط ولا للخوف.. لو اتأخرت صاحب الكافيه هيخصم من المرتب ومش ناقصه. وخلصت الأكل بسرعه وحطته قدام مامتها.. ونزلت بسرعه على شغلها في الكافيه. حكاية فارس وأمل بقلمي ملك إبراهيم. بعد يومين، الكافيه اللي بتشتغل فيه أمل كان زحمة وصوته عالي، ريحة القهوة مالية المكان، أمل لابسة اليونيفورم البسيط وشايلة الصينية وماشية بسرعة بين الترابيزات، قلبها مقبوض وحاسة إن اليوم تقيل على قلبها وايامها بقت شبه بعض. قربت تقدم الطلبات لمجموعة شباب قاعدين بيبصوا عليها بطريقة مش مريحة، واحد فيهم بصلها ببجاحة ومد إيده ومسك إيديها: "إيه القمر ده" أمل اتخضت وقلبها وقع في رجليها، سحبت إيديها بسرعة وهي بتترعش: "ابعد إيدك!" من الخضة إيديها خبطت في الكوباية، الكوباية وقعت واتكسرت على الأرض بصوت عالي، كل الناس بصت عليهم. أمل ما قدرتش تسكت، زعقت للشاب وصوتها طالع من القهر: "اللي انت بتعمله ده ميصحش" الشاب حس إن شكله بقى زفت قدام أصحابه وإنها هتفضحه في المكان، قام وقف مرة واحدة وزعق بصوت أعلى منها عشان يقلب الترابيزة عليها: "انتو شايفين؟ هي اللي بتعرض نفسها عليا!" ، وأصحابه كلهم شهدوا معاه كدب: "أيوه حصل، البنت دي مش تمام" أمل اتجمدت مكانها، حست بالظلم وهما بيشهدوا ضدها ، عينيها دمعت ولقت صاحب المكان جاي يزعق لها. كان فيه شاب قاعد في ترابيزة تانية لوحده، شاف كل حاجة من الأول وعارف إن الشباب دول كدابين، ما استحملش، قام وقف وزعق مع الشاب: "انت كداب، البنت ما عملتش حاجة، انت اللي مسكت إيديها!" الشباب زعقوا والمكان بقى فوضى ومش عارفين مين بيتخانق مع مين.. وحصلت خناقة كبيرة وزعيق وتكسير، والناس اتلمت، وفي الآخر البوليس جه وخد كل أطراف المشكلة على القسم. في القسم ريحة السجاير خانقة وصوت عالي، أمل قاعدة على كرسي خشب ووشها مخطوف وبتعيط من الخوف، الظابط بص لها وقال بلهجة رسمية: "لازم حد يجي يضمنك يا أنسة عشان تخرجي ، شكلك طيبة وبنت ناس طيبين ومش قد البهدلة في القسم" أمل بقت مش عارفة تعمل إيه، ملهاش حد في الدنيا غير أمها، وأمها ست مريضة وتعبانة مش هتقدر تيجي لها في الوقت ده، قعدت تفكر بسرعة ودماغها هتنفجر من كتر التفكير ، ملقتش غير دنيا صاحبتها اللي جت في بالها، مسكت التليفون بإيد بتترعش وقررت تتصل بيها. رواية بقلم الكاتبة ملك إبراهيم في قصر الحريري، القصر كبير وكل حاجة فيه بتلمع بس بارد، دنيا كانت قاعدة في أوضتها بتذاكر ومشغلة موسيقى كلاسيكية ، جاتلها المكالمة، أول ما ردت سمعت أمل بتعيط وبتقول لها اللي حصل بسرعة: "الحقيني يا دنيا، أنا في القسم!" دنيا قامت بسرعة وقلبها اتقبض، لبست أي حاجة قدامها ونزلت تجري عشان تستأذن فارس وتروح لها. تحت في الصالون كان فارس قاعد زهقان وعايز يهرب من القاعده مع عمته درية وبنت عمته نهى، نهى لازقة فيه وعينيها مش بتنزل من عليه، هي بتحب فارس، وعمته عايزة تجوزه لبنتها بأي طريقة عشان كل الفلوس والأملاك اللي عند فارس تكون ليهم. عمة فارس عاشت معاه هو وأخته في القصر من بعد موت والدهم، والدته ماتت وهي بتولد دنيا، وبعدها بعشر سنين والد فارس مات، ومن ساعتها عمته هي اللي عايشة معاهم هي وبنتها نهى، واخدة مكان الأم بس من غير قلب أم. فارس كان زهقان من القعدة ومن تلزيق نهى ومن كلام عمته اللي بقى حافظه عن ظهر قلب، جواه بيقول: إمتى أخلص من الفيلم الحمضان ده. دنيا قربت منهم بسرعة وهي مخضوضة وقالت بسرعه: "فارس.. أنا لازم أخرج دلوقتي بعد إذنك.. أمل صاحبتي في مشكلة ومحتاجة مساعدة" فارس أول ما سمع كده حس إنها انقذته، لقى إن دي فرصته عشان يهرب من عمته وبنتها، قام وقف بسرعة وقال لها: "ماشي يا دنيا .. أنا هاجي معاكي أوصلك عشان الوقت متأخر" وقام خرج معاها بسرعة من غير ما يبص وراه. نهى بصت لأمها بضيق وعينيها بتطلع نار من الغيظ: "شايفة يا ماما.. وكأنه متفق مع دنيا عشان يقوم يسيبنا ويمشي" والدتها ردت بثقة وابتسامة كلها خبث، طبطبت على إيد بنتها: "سيبيهم.. هيروح مننا فين يعني! هو مش هيتجوز غيرك في الآخر صدقيني" رواية الكاتبة ملك إبراهيم في القسم أمل واقفة لوحدها في ركن، خايفة ومرعوبة من كل اللي حواليها، صوت الزعيق والشتايم مالي المكان، وهي حاسة إنها صغيرة وتايهة، إيديها بتترعش وعينيها حمرا من كتر العياط، جواها بتقول: أنا إيه اللي جابني هنا؟ أنا عمري ما دخلت مكان زي ده. وفجأة من باب القسم.. لقت دنيا داخلة تجري عليها ولهفتها باينة في وشها، ووراها أخوها ماشي بثقة وهيبة، خطوته لوحدها بتخلي العساكر تبص له. دنيا قربت منها وخدتها في حضنها تطمن عليها: "أمل! انتي كويسة؟" أمل أول ما شافتها انهارت أكتر وكانت بتبكي وصوتها متقطع: "معملتش حاجة والله.. هو اللي مسك إيدي وأنا بعدت إيدي الكوباية وقعت وحصلت الخناقه .." فارس واقف قدامها وباصصلها، شايف خوفها اللي مالي وشها، وبهدوء وصوته واطي عشان يطمنها قال لها: "اهدي يا آنسة أمل" وسابهم ودخل أوضة الظابط، قعد قدامه وفهم منه اللي حصل بالظبط، عرف إن واحد من الشباب عاكسها وهي بتقدم له الطلب، وفي شاب تاني هو اللي دافع عنها، وإن صاحب الكافيه جه وطلب من الشباب يتصالحوا وهو اتنازل عن الخساير اللي حصلت في الكافيه ولازم ضامن للبنت عشان تخرج. فارس خلص كل حاجة في دقيقتين، مضى الضمان وخرج من أوضة الظابط، وقف قدام أمل وقال لها بمنتهى الهدوء: "خلاص يا آنسة أمل هتروحي.. اتفضلي نوصلك" أمل اتحركت معاهم وهي لسه بتبكي وبتحاول تمسح دموعها بإيديها، ماشية وراهم وراسها في الأرض من الكسوف. أول لما خرجوا من القسم، لقت الشاب اللي دافع عنها واقف مستنيها برا، أول ما شافها قرب منها بسرعة وهو قلقان: "يا آنسة.. طمنيني انتي كويسة.. أنا مردتش أروح قبل ما اطمن عليكي" فارس فجأة حس إنه اتضايق، صدره اتقبض لما شاف الشاب ده بيتكلم معاها باهتمام كده، وقف وبص لهم وساكت. أمل ردت عليه بهدوء وصوتها لسه مخنوق: "شكراً على كل اللي عملته معايا.. انت الوحيد اللي دافعت عني" الشاب قال لها وهو متعصب من صاحب الكافيه: "بس الراجل صاحب الكافيه ده مش تمام على فكرة.. المفروض هو اللي كان يجيبلك حقك.. مش يرفدك من الشغل" فارس اتعصب.. وشه بان عليه الغيرة اللي هو نفسه مش فاهمها، وقاطعه بصوت حاد: "اطمن متقلقش.. احنا هنجيب لها حقها.. ومش عايزين نعطلك معانا أكتر من كده.. اتفضل ومتشكرين" الشاب بص لفارس وفكره أخوها، هز راسه وقال بجدعنة: "أنا عندي إخوات بنات مرضاش يحصلهم كده.. عن إذنكم" الشاب مشي، وأمل بصت حواليها، الشارع ضلمة وفاضي ومش عارفة هترجع البيت إزاي. دنيا مسكت إيديها وقالت لها بحنية: "يلا أمل احنا هنوصلك" أمل بصت لفارس بتوتر واتكسفت، حست إنها تقيلة عليهم: "لا مش هينفع.. كفاية كده أنا تعبتكم معايا.. شكراً على كل اللي عملتوه معايا" فارس رد بهدوء وعينيه عليها: "إحنا معملناش حاجة.. خلينا نوصلك لأن الوقت اتأخر" أمل اتكسفت تقوله إنها ساكنة في منطقة بسيطة ومش هينفع يروح فيها بعربيته الفخمة دي، قربت من ودن دنيا وهمست لها: "ماينفعش يا دنيا، الحارة بتاعتنا ضيقة ومش هينفع ندخلها بالعربية بتاعكم " دنيا ضحكت وردت عليها بهزار وهي بتبص لأخوها: "لا انتي متعرفيش فارس خالص.. متشيليش هم الموضوع ده" فارس مكنش فاهم هما بيقولوا إيه، فدنيا قالت له: "أمل ساكنة في منطقة بعيدة شوية" فارس هز راسه وقال لها بنبرة حاسمة: "طب اركبوا العربية يلا مش هينفع نفضل واقفين كده" وركبوا العربية مع فارس، دنيا قعدت جنبه، وأمل قعدت ورا، قاعدة ضامة نفسها ومكسوفة تلمس أي حاجة في العربية الغالية دي. دنيا فتحت الكلام عشان تكسر الصمت وقالت لأمل: "وهتعملي إيه يا أمل في موضوع الشغل ده؟" ردت أمل بحزن وصوتها واطي وهي بتبص من الشباك: "هدور على شغل تاني.. وإن شاء الله ألاقي شغل أحسن" فارس طول الطريق بيخطف نظرات عليها في المراية، شايفها شاردة وعينيها مليانة هم ومسؤولية كبيرة أكبر من سنها بكتير. أمل كانت غير كل البنات اللي يعرفهم في سنها، هي شايلة الدنيا فوق كتافها، مش زي البنات اللي بيشوفهم حواليه.. وكان جواه إحساس غريب أول مرة يحسه: البنت دي مختلفة.. فيها حاجة بتشده ليها وكأنها حته منه.. في حاجة بتربط روحه بروحها.. مش حاسس ابدا انها غريبة عنه رغم انه مشفهاش غير مرتين بس.. ياترى هو ليه حاسس انها قريبه منه.. دا اللي هنعرفه في الحلقة الجاية ... بقلمي ملك إبراهيم... يتبع في الجزء الثاني. --- الفصل الثاني الكاتبة ملك إبراهيم أمل كانت غير كل البنات اللي يعرفهم في سنها، هي شايلة الدنيا فوق كتافها، مش زي البنات اللي بيشوفهم حواليه.. وكان جواه إحساس غريب أول مرة يحسه: البنت دي مختلفة.. فيها حاجة بتشده ليها وكأنها حته منه.. في حاجة بتربط روحه بروحها.. مش حاسس ابدا انها غريبة عنه رغم انه مشفهاش غير مرتين بس.. ياترى هو ليه حاسس انها قريبه منه. وصلها المنطقة اللي عايشة فيها، شوارع ضيقة ونورها ضعيف.. الطريق متكسر والبيوت كلها كأنها داخله في بعض. أمل أول ما شافت أول الحارة قالت بسرعة وهي متوترة: "معلش هنزل هنا.. أقف هنا لو سمحت" فارس استغرب وبص لها في المراية وسألها: "خلينا نوصلك قدام البيت" أمل بتصمم وبتتكلم بسرعة وعينيها في الأرض: "لا معلش نزولني هنا، كفاية كده" ونزلت من العربية بسرعة وشكرتهم وهي بتبص لـ دنيا ومكسوفه تبص لـ فارس: "شكراً بجد، تعبتكم معايا" دنيا ابتسمت لها بحب: "ولا تعب ولا حاجة يا حبيبتي.. خلي بالك من نفسك ولو احتاجتي اي حاجة في اي وقت كلميني" أمل رفعت عينيها بسرعه وبصت ل فارس وقالت له: "شكرا" فارس هز راسه بهدوء. أمل مشيت بسرعة دخلت جوه الحارة الضلمة وهي حاسة إنها مش عايزة يشوفوا هي ساكنة فين بالظبط. فارس وقف شويه متحركش غير لما دخلت جوه الحارة.. واتحرك بالعربية وطول الطريق بيفكر وبيسأل دنيا عن كل حاجة تخص أمل، ودنيا بتحكي ومتحمسة: "أمل يتيمة الأب، والدتها ست مريضة.. وأمل هي اللي بتصرف عليها من شغلها" وسألها: "ملهاش أهل او عيلة يساعدوها؟" قالت له: " ملهاش حد غير مامتها.. ومامتها تعبانة من زمان، أمل هي اللي شايلة كل حاجة" دنيا اتحمست أكتر وهي بتحكي له وحكت كل حاجة تعرفها عن أمل وقالت له: "ده فيه بلطجي في المنطقة عندهم اسمه عباس بيضايق أمل دايماً عشان عايز يتجوزها.. وأمل رافضاه" فارس أول ما سمع الكلام دا إيده مسكت الدريكسيون جامد، حس بنار جواه ومشاعر مش مفهومة، غيرة على غضب على حنية، هو نفسه مش فاهم إيه اللي بيحصله، بس أمل كانت ملفتة ليه بشكل غريب، مختلفة عن أي بنت شافها.. كان بيسمع اخته وهو عامل نفسه مش مهتم اوي.. بس كل كلمة كانت دنيا بتقولها عن أمل.. كانت بتتحفظ جوه قلبه وعقله. رجعوا القصر وطلع أوضته وهو لسه بيفكر فيها، قلع الجاكيت ورمى نفسه على السرير، صورتها وهي خايفة في القسم مش بتروح من دماغه وبيسأل نفسه : ليه البنت دي اللي شغلتني كده من أول مرة؟ حكاية فارس وأمل بقلمي ملك إبراهيم. في صباح اليوم التالي، فارس كان صاحي من بدري على غير عادته، ما نمش طول الليل، راح أوضة أخته دنيا وخبط عليها، دنيا كانت جاهزة عشان الجامعة ولابسة شنطتها. فارس دخل وقال لها وهو بيحاول يبان طبيعي: "لو صاحبتك ملقتش شغل كويس.. أنا ممكن أشغلها عندي في الشركة" دنيا فرحت جداً وكانت بتتنطط من الفرحة عشان هيساعدوا أمل، جريت حضنت أخوها وقالت بسعادة: "بجد يا فارس؟ يا حبيبي ربنا يخليك ليا! أنا هقابل أمل في الجامعة النهاردة وهقولها" فارس كان بيتمنى من قلبه إن أمل توافق على عرض الشغل بتاعه، جواه بيقول: يارب توافق، عايز أشوفها كل يوم. خرج من أوضة أخته وهو بيتحرك بسرعة قبل ما عمته وبنتها يصحوا وينكدوا عليه. في الجامعة، أمل كانت مصدومة ومش مصدقة وهي بتسمع كلام دنيا، واقفة في الطرقة وفاتحة بوقها: "شركة الحريري؟ بتتكلمي بجد يا دنيا؟" هي عارفة إن شركة الحريري شركة كبيرة أوي ومش بيشتغل فيها أي حد، شركة ليها اسم يخض، جواها خناقة: أروح؟ طب هينفع؟ طب هلبس إيه؟ أول لما خلصوا المحاضرات، دنيا خدتها من إيديها وراحوا الشركة، أول ما أمل دخلت لقت عالم تاني عمرها ما كانت تحلم تدخله، الشركة كلها إزاز وموظفين لابسين بدل وشيك وريحة برفان غالي، حست إنها تايهة. دنيا قالت للسكرتيرة بتاعة فارس تبلغه انهم هنا وعايزين يقابلوه. دخلوا المكتب وفارس رحب بيهم، كان لابس بدلة سودا شيك وطالع وسيم أكتر من أي مرة، أول ما شاف أمل لاحظ توترها وخوفها، إيديها بتترعش ومش عارفة تبص فين. حاول يطمنها بصوت هادي: "ما تقلقيش، الشغل في الشركة مش هيكون صعب عليكي، هتتعلمي كل حاجة واحدة واحدة" أمل طول الوقت كانت بتتهرب بعيونها وكأنها خايفة تبص في عيون فارس، كل ما عينيها تيجي في عينيه تنزلها بسرعة، قلبها بيدق جامد ومش فاهمة ليه. وهو بقى عنده فضول أكتر للبنت دي، نفسه يدخل عالمها ويحل كل مشاكلها وكأنها بقت مسؤولة منه خلاص، باصصلها وساكت وجواه بيقول: هتفضلي تهربي مني لحد إمتى؟ بيخلص كلام معاهم وأمل بتخرج مع دنيا من مكتب فارس عشان تستلم شغلها الجديد، ماشية وقلبها بيدق وبتتفرج على المكاتب، وبتتفاجئ إن وظيفتها هتكون مساعدة السكرتيرة الخاصة بصاحب الشركة.. فارس الحريري. للحظة وقفت مكانها وحست بخنقة، إحساس إن فارس شغلها في الشركة شفقة عليها مش أكتر، جواها بتقول: هو جابني هنا عشان صعبت عليه؟ أكيد دنيا طلبت منه يشغلني هنا عشان يساعدوني.. مفيش حاجة اسمها مساعدة السكرتيرة! اتكلمت مع السكرتيرة عن مواعيدها عشان الجامعة، بتتكلم وهي مكسوفة: "أنا عندي محاضرات الصبح.. ينفع أجي بعد الضهر؟" ، السكرتيرة بترد بابتسامة عملية: "تمام، هنظبطها" وبتمشي مع دنيا وهي بتقول لها: "هبدأ شغلي من بكره إن شاء الله" رواية الكاتبة ملك إبراهيم اليوم التالي، أمل وصلت الشركة بدري أوي قبل كل الموظفين، كانت عايزة تثبت نفسها في الشغل عشان متحسش إن شغلها هنا شفقة، لابسة أحسن حاجة عندها وقلبها مقبوض، جواها بتتحدى نفسها: هوريهم إني أستاهل المكان ده. في قصر الحريري، فارس نزل من أوضته عشان يروح الشركة، لابس بدلته وريحة عطره مالية المكان. عمته درية ونهى بنتها كانوا صاحيين من بدري ومجهزين الفطار على السفرة الطويلة، عمته أول ما شافته ابتسمت بمكر وقالت له: "أنا مجهزالك الفطار اللي بتحبه.. ونهى ساعدتني" فارس بيبتسم لهم بمجاملة، ابتسامة باردة وهو عارف تمثيلهم، وقعد يبدأ ياكل بسرعة عشان يخلص. دنيا بتنزل من فوق وهي بتقول بصوت عالي: "صباح الخير" فارس بيستغرب إنها لسه ملبستش ومراحتش الجامعة، وسألها: "إيه ده؟ انتي لسه مروحتيش الجامعة ليه؟" دنيا ردت بهدوء وهي بتقعد قدامه: "مفيش محاضرات مهمة النهاردة.. وكمان أمل مش هتروح الجامعة عشان عايزة تكون أول يوم ليها في الشركة تروح بدري.. فـ انا وهي اتفقنا منروحش الجامعة النهاردة" نهى أول ما سمعت اسم أمل، وشها اتبدل. اتكلمت بسخرية وقالت لها: "أنا مش عارفة انتي مستحملة تكوني في الجامعة دي إزاي وسط الطبقة الفقيرة" ولفت لفارس وقالت له بدلال: "المفروض كنت دخلتها جامعة خاصة مع طبقة من مستوانا". فارس ساب المعلقة مرة واحدة، ورد عليها بغضب وصوته كان عالي: "دي الجامعة اللي أنا اتخرجت منها.. وأنا عارف مصلحة أختي كويس". عمته حست إن بنتها لخبطت في الكلام، فحاولت تصلح من وراها بسرعة وقالت له وهي بتضحك: "لا يا حبيبي هي مش قصدها حاجة، نهى بس خايفة على دنيا". لكن فارس كان عارف إن عمته وبنتها شخصيات متعجرفة، وهو ماكانش بيحب أسلوبهم ولا طريقتهم، بص لهم بقرف وقام. خرج عشان يروح الشركة وهو جواه نار من كلام نهى وعمته.. بقى حاسس ان وجودهم في حياته خانقه مش عارف يخلص منها.. بس هو بيصبر لأن عمته اللي ربت اخته دنيا بعد موت والدته. فارس مشي ودنيا قامت طلعت أوضتها وهي متضايقة من كلام بنت عمتها. درية أول ما فارس خرج، لفت لبنتها وزعقت لها بصوت واطي: "بطريقتك دي هتطيري فارس من إيدك". نهى قامت وقفت وهي متنرفزة واتكلمت بقرف: "هو إيه اللي بيعجبه في الطبقة الفقيرة مش فاهمة" ردت درية على بنتها: "عشان ام فارس كانت من طبقة فقيرة.. وحصلت مشاكل كتير لما أخويا اتجوزها زمان وكل العيلة كانوا بيعايروها انها من طبقه فقيرة لحد ما ماتت.. واضح ان دا مآثر على فارس لحد دلوقتي" نهى مهتمتش بكلام والدتها.. وقامت شايلة شنطتها وقالت بزهق: " انا مش ناقصه عُقد علي الصبح.. أنا رايحة النادي". والدتها فضلت قاعدة لوحدها على السفرة، بتبص على باب القصر اللي خرج منه فارس، وعينيها كانت بتلمع بالطمع وبتقول لنفسها: "لازم فارس يتجوز نهى بأي طريقة.. احنا مش هينفع نعيش في مستوى أقل من ده". رواية الكاتبة ملك إبراهيم في الشركة، فارس دخل وهو متعصب شوية، وشه كان مكشر من كلام عمته وبنتها، وكان متجه لمكتبه بخطوة سريعة. وهو ماشي شاف أمل قاعدة مع السكرتيرة بتاعته، كانت بتشتغل وكلها نشاط وحماس، بترتب الورق وبتكتب بسرعة وعينيها مركزة، وكان شكلها عايزة تثبت نفسها بأي طريقة. ابتسم غصب عنه، الابتسامة طلعت لوحدها من غير ما يحس، ودخل المكتب وقعد على كرسيه وطلب القهوة: "هاتيلي قهوة". السكرتيرة بصت لأمل وقالت لها: "أمل، دخلي القهوة لفارس بيه". دخلت أمل وهي متوترة وشايلة الصينية وإيديها كانت بتترعش، حاطة راسها في الأرض ومش قادرة ترفع عينيها. فارس بص لها وحاول يهديها وسألها بهدوء: "إيه أخبار الشغل معاكي؟" ردت بهدوء وصوتها كان واطي: "تمام.. بحاول أتعلم". هز راسه وبصلها بنظرة إعجاب وقال: "هتتعلمي.. انتي طموحة وشاطرة". رفعت عينيها وبصت له غصب عنها، أول ما عينيها جت في عينيه حست إن قلبها بيدق بسرعة، دقة غريبة وجسمها ارتجف، اتلخبطت وقالت بسرعة: "شكراً". هو كمان في اللحظة دي حس بحاجة غريبة، قلبه دق، وكأنها بقت مسؤولة منه، كان عايز يحميها من أي حاجة، وجواه كان بيقول: مالك يا فارس؟ إيه اللي بيحصلك ده؟ اتحركت عشان تخرج من المكتب بسرعة قبل ما تتلخبط أكتر، وهو شرب من القهوة وابتسم لوحده، أول مرة من زمان يحس إن القهوة طعمها حلو. حكاية فارس وأمل بقلمي ملك إبراهيم. عدى شهر وأمل كانت شغالة في الشركة، فهمت الشغل بسرعة وبقت محبوبة من كل الموظفين، بابتسامتها وجدعنتها، أي حد يحتاج حاجة كانت تروح تساعده من غير ما يطلب. فارس حس إن الدنيا بقى ليها طعم تاني بعد ظهور أمل في حياته، اليوم اللي كان بيدخل الشركة ويلاقيها قاعدة على مكتبها كان بيبقى أجمل يوم، وشه كان بينور لوحده، واليوم اللي كان بيبقى عندها جامعة، كانت بتفضل عيونه على كاميرات المراقبة طول النهار عشان يشوفها أول لما توصل الشركة بعد ما خلصت محاضراتها، وجواه كان بيقول: اتأخرتي ليه؟ بقى يحب يسمع أي حاجة دنيا أخته تحكيها عن أمل، وأقل موقف كان بيحصل معاهم في الجامعة كان بيركز فيه كأنه أهم حاجة في حياته. وأمل كمان بقت تحب تسمع كلام دنيا عن فارس أخوها، وهي بتحكي عنه وعن بيحب إيه وبيكره إيه، من غير ما تحس بقت أمل مهتمة بفارس بطريقة ملفتة، قلبها كان بيدق لما دنيا تجيب سيرته، ودنيا أخدت بالها من اهتمام فارس إنه يعرف كل حاجة عن أمل بدون ما يظهر اهتمامه، واهتمام أمل تعرف كل حاجة عن فارس بدون ما تظهر اهتمامها، والاتنين كانوا بيمثلوا إنهم مش مهتمين. لحد اليوم ده، فارس كان رايح الشركة بدري عن ميعاده لأنه كان عارف إن أمل مفيش عندها جامعة النهاردة، وكان داخل مبسوط إنه هيشوفها طول اليوم. أول لما دخل شاف أمل قاعدة على مكتبها وقدامها واحد من الموظفين، كان واقف قريب منها وبيتكلم معاها ونظراته ليها كانت واضحة جداً إنه معجب بيها، وكان بيضحك وهي مكسوفة. فارس حس بالغيرة والغضب، جواه نار إشتعلت مرة واحدة، وشه احمر ودخل زعق بصوت عالي هز الشركة كلها: "انتو سايبين شغلكم وجايين تهزروا هنا!" أمل اتصدمت لأنها أول مرة تشوف فارس غضبان كده وبيزعق، قلبها وقع في رجليها. والموظف اتخض واعتذر منه ورجع على مكتبه بسرعة: "آسف يا باشمهندس فارس". فارس بص لأمل وقال لها بأمر: "تعالي ورايا على المكتب حالاً". السكرتيرة كانت متابعة اللي حصل من بعيد وفهمت إن فارس غيران على أمل، كانت ملاحظة نظراتهم لبعض الفترة الأخيرة، أول ما فارس دخل مكتبه راحت ماسكة التليفون واتصلت على نهى وقالت لها بخبث: "يا نهى هانم، في بنت جديدة هنا وشكلها عايزة توقع فارس بيه في حبها". أما في مكتب فارس، أمل وقفت قدامه وهي خايفة، إيديها كانت بتترعش لأنها أول مرة تشوفه غضبان كده، واقفة وراسها في الأرض. فارس حاول يهدى بس صوته لسه كان حاد: "كان بيتكلم معاكي في إيه؟" أمل استغربت ورفعت عينيها: "هو مين؟" رد فارس بعصبية أكتر: "الباشمهندس اللي سايب شغله وواقف يتكلم معاكي". أمل ردت ببراءة وهي مش فاهمة هو متعصب ليه: "هو كان بيتكلم عادي.. حاجة مش في الشغل". فارس اتجنن أكتر وبص لها بطريقة مرعبة وقرب منها خطوة: "حاجة إيه؟" أمل استغربت وقالت وهي بترجع لورا: "كلام عادي.. كان بيتكلم عن أنواع القهوة اللي بيحب يشربها الصبح وو.." زعق فيها مرة واحدة: "وانتي مالك بالقهوة اللي بيشربها؟" أمل رجعت بضهرها لورا وهي خايفة ودموعها هتنزل، وهو بيقرب منها وقال لها بتحذير وصوته حاد يخوف: "أنا مش عايز وقت الشركة يضيع في أي كلام فاضي مفهوم؟" هزت راسها بخوف: "حاضر". فارس بص لها أوي ولاحظ إنها كانت حاطة روج خفيف على شفايفها، سألها بغضب وعينيه على شفايفها: "وإيه اللي انتي حاطاه على شفايفك ده؟" أمل اتكسفت وحطت إيديها على بوقها وقالت: "مفيش حاجة!" فارس وهو بيبص على شفايفها ومش قادر يشيل عينه قال: "مفيش إزاي يعني؟ هو أنا أعمى مش شايف اللي انتي حاطاه.. تروحي الحمام تغسلي وشك.. ممنوع تحطي أي حاجة من الحاجة دي مفهوم". هزت راسها بخوف بمعنى حاضر، ودموعها كانت محبوسة في عينيها. فارس قال لها وهو بيحاول يسيطر على نفسه: "اتفضلي يلا". خرجت بسرعة وهي خايفة ومستغربة لأن كل البنات اللي في الشركة حتى السكرتيرة بتاعته كانت بتحط مكياج عادي، اشمعنا هي اللي منعها، وجواها كانت بتقول: هو بيعاملني كده ليه؟ هو أنا عملت إيه؟ وفارس قعد على مكتبه وهو مضايق وحاسس إن اللي جواه اتجاه أمل ماكانش عادي، قلبه كان بيدق بسرعة والنار بتزيد في قلبه، وجواه كان بيقول لنفسه: هو انا إيه اللي بيحصلي ؟معقول بغير عليها ؟!!.... بقلمي ملك إبراهيم... يتبع في الجزء الثالث الفصل الثالث رواية الكاتبة ملك إبراهيم فارس قعد على مكتبه وهو مضايق وحاسس إن اللي جواه اتجاه أمل ماكانش عادي، قلبه كان بيدق بسرعة والنار بتزيد في قلبه، ومن جواه كان بيقول لنفسه: هو انا إيه اللي بيحصلي ؟معقول بغير عليها ؟!!. رواية الكاتبة ملك إبراهيم تاني يوم في الجامعة، كانت أمل قاعدة مع دنيا في الكافيتيريا ووشها كان لسه زعلان من اللي حصل امبارح، كانت بتحكي لدنيا اللي حصل من أخوها وهي متلخبطة: "أخوكي زعقلي امبارح من غير سبب، وخلاني أمسح الروج وقالي ممنوع أحط حاجة على وشي " اتفاجئت إن دنيا ضحكت ضحكة كبيرة وقالت لها بثقة: "أنا كنت متأكدة" أمل سألتها وهي مستغربة: "متأكدة من إيه؟" دنيا قربت منها وقالت لها بصوت واطي كأنه سر: "إن فارس أخويا بيحبك.. واللي عمله معاكي امبارح ده عشان غيران عليكي" أمل اتصدمت ووشها احمر مرة واحدة واتكسفت وقالت لها بسرعة: "أكيد لا.. مستحيل يحبني" دنيا بصتلها بتركيز وقالت لها: "مستحيل ليه.. وانتي كمان بتحبيه على فكرة" أمل اتكسفت أكتر وقامت وقفت وشنطتها وقعت منها من التوتر وقالت لها: "بطلي هزار.. مفيش حاجة من الكلام ده" دنيا قالت لها وهي واثقة من كلامها وبتضحك: "أنا واثقة من كلامي، انتي وفارس بتحبوا بعض.. واللي عمله امبارح كان غيرة عليكي صدقيني" أمل اتوترت وقلبها كان بيدق جامد، مكنتش عارفة ترد، قالت لها وهي بتهرب من الكلام: "الكلام دا مش حقيقي.. أنا هروح الشركة اتأخرت" دنيا ضحكت وقالت لها: "ماشي يا أمل اهربي.. بس دا مش هيغير اللي انا قولته.. انتي وفارس بتحبوا بعض" أمل بصت لها بغيظ وسابتها ومشيت بسرعة. دنيا بصت قدامها وقالت بسعادة: "يارب يا أمل تكوني انتي من نصيب أخويا فارس.. نفسي ربنا يفرح قلبه ويعوضه عن كل اللي شافه في حياته ويلاقي الحب إللي يستحقه" رواية الكاتبة ملك إبراهيم. أمل وصلت الشركة وهي طول الطريق كانت بتفكر في كلام دنيا، كل كلمة كانت بترن في ودنها، وكانت حاسه من جواها إن كلام دنيا ممكن يكون صح! وبتسأل نفسها؛ ياترى ممكن يكون فارس بيحبها فعلاً، نفسها تصدق، بس كانت خايفة وشايفة إن ده مستحيل، وبتقول لنفسها هو فين وهي فين، ده فارس الحريري رجل الأعمال الغني اللي كل البنات بتتمنى منه نظرة.. وهي أمل البنت البسيطة اللي ساكنة في حارة. قعدت على مكتبها شاردة وكانت بتفكر، وخدودها كانت حمرا من الخجل كل ما تفتكر كلام دنيا "فارس بيحبك وبيغير عليكي" عيونها كانت بتلمع بسعادة وخجل. كانت ماسكة القلم وبترسم دواير على الورق وهي سرحانة. وفجأة الباب اتفتح جامد ودخلت نهى بعجرفة، كانت لابسة لبس غالي ونضارة شمس على راسها، وقفت قدام أمل وهي بتبص للسكرتيرة بمعنى هي دي؟ والسكرتيرة هزت راسها بمعنى أيوه هي. نهى بصت لأمل من فوق لتحت بقرف وقالت لها بأمر: "انتي يا اسمك إيه.. اعمليلي قهوة وهاتيها على مكتب فارس" أمل استغربت.. ونهى مستنتش ودخلت على مكتب فارس وهي ماشية بخطوات كلها ثقة وغرور.. وأمل كانت بتبص على نهى وهي داخلة مكتب فارس بدون إذن كأنها صاحبة مكان. سألت السكرتيرة وهي مصدومة: "مين دي؟" السكرتيرة ردت ببرود وقالت لها: "دي آنسة نهى خطيبة فارس بيه" هنا كل أحلام أمل اتكسرت قدامها مرة واحدة، الكلمة نزلت على قلبها زي السكـ ينة، حست بوجع في قلبها ووشها انطفى، النور اللي كان منور وشها من شوية بقى شاحب زي الاموات ، وكانت حاسه بوجع وبتسأل نفسها بقهرة، خطيبته؟ وليه دنيا خبت عليا انه خاطب ؟وأنا كنت بفكر في إيه؟ أنا غبية أوي. أمل قعدت تكمل شغلها عادي، كانت بتحاول تبان طبيعية بس إيديها كانت بتترعش وقلبها كان موجوع من كلمة خطيبة فارس بيه، كانت بتحاول تشغل نفسها في الورق وهي بتقول لنفسها بغضب: "لو سألتني فين القهوة هقولها ان انا مش شغاله في البوفيه هنا.. تخلي خطيبها يطلب لها القهوة من البوفيه" . ونهى كانت قاعدة في مكتب فارس عمالة تتكلم في أي حاجة، رغي وضحك مصطنع وكانت مستنية أمل تدخل بالقهوة عشان تذلها وتشوف نظراتها هي وفارس وتتأكد بنفسها من كلام السكرتيرة. أمل مدخلتش بالقهوة زي ما نهى طلبت منها، كملت شغلها عادي برا. وفارس كان متضايق من رغي نهى اللي مالوش لازمة. نهى حطت رجل على رجل وهي بتقول بعجرفة:" وانا داخله طلبت قهوة من البنت السكرتيرة الجديدة.. هي ليه ماجبتهاش لحد دلوقتي ؟ انت لازم ترفد البنت دي يا فارس" فارس بص لها بغموض وقال: "ارفدها عشان ماجبتش لكي القهوة؟ انتي فاكره نفسك إيه يا نهى؟! وبعدين انتي جاية عايزه ايه بالظبط؟ عماله تلفي وتدوري وتتكلمي في مواضيع ملهاش أي لازمة.. وانا عندي اجتماع دلوقتي برا الشركة ولازم امشي" نهي وقفت وقالت بدلال:" انت لازم تعرف البنت دي انا ابقى مين يا فارس.. مينفعش اطلب منها قهوة وهي تتجاهلني بالشكل دا.." فارس مردش عليها وقام وقف وخرج من المكتب، ونهى خرجت وراه بسرعة وهي بتجري وراه بالكعب العالي. أمل اتصدمت لما شافت فارس خارج من مكتبه ونهى خارجه وراه. قلبها دق بخوف لما شافت فارس بيقرب منها ووقف قدام مكتبها. ونهى وقفت وراه وهي بتبص ل أمل بشماته وكأنها عارفه اللي فارس هيعمله دلوقتي. أمل وقفت قدام فارس وكان قلبها بيدق بخوف.. بس حاولت ترسم القوة على وشها وهي واخده قرار من جواها انها مش هتسمح لأي حد يذلها. فارس كان بيبص في عيون أمل.. شايف لمعة الخوف اللي في عنيها.. وحاسس برجفتها إللي بتحاول تداريها. اتكلم بهدوء وهو بيبص في عنيها : "عندنا اجتماع برا الشركة.. جهزي نفسك عشان هتيجي معايا الاجتماع ده" أمل اتصدمت ومش مصدقة وبصت له: "أنا؟" رد وهو بيمشي ناحية الأسانسير: "تعالي ورايا" أمل بصت للسكرتيرة بدهشة واتحركت وراه بسرعة وهي مش فاهمة حاجة. نهى قربت من السكرتيرة وسألتها وهي هتتجنن: "اجتماع إيه اللي عنده برا الشركة؟" ردت السكرتيرة وهي بتبص على جدولها: "مفيش اجتماع برا الشركة.. أنا عندي جدول بكل الاجتماعات" نهى بصت قدامها بصدمة وقالت: "يعني هو خدها وراحوا فين؟" ردت السكرتيرة بخبث: "أنا قولت لحضرتك.. في حاجة بين باشمهندس فارس.. وبين البنت دي" نهى بصت للسكرتيرة وعينيها كانت بتطلع نار وقالت لها: "أنا عايزة أعرف كل حاجة عن البنت دي.. وعنوانها" السكرتيرة هزت راسها بثقة: "اعتبريه حصل" ونهى خرجت من الشركة وهي عندها إصرار إنها مش هتسمح لحد ياخد منها فارس، كانت حاسه من جواها ان مستحيل واحدة زي دي تاخده منها. حكاية فارس وأمل بقلمي ملك إبراهيم. في عربية فارس، كانت أمل قاعدة متوترة ومش عارفة المفروض هتعمل إيه في الاجتماع اللي فارس قال عليه ومش عارفة هيروحوا فين، كانت ضامة شنطتها وبتفرك في إيديها. فارس لاحظ إنها كانت متوترة، اتكلم بهدوء وصوته كان حنين: "اهدي.. ده اجتماع عادي" أمل قالتله وصوتها كان بيترعش: "أنا عمري ما حضرت اجتماع!" فارس بص لها أوي، كانت نظرة طويلة كلها إعجاب وحنية، لدرجة إنها اتكسفت من نظراته وخدودها احمرت وبصت في الأرض. فارس ابتسم غصب عنه وبص قدامه وساق. وصلوا مطعم فخم جداً على النيل، كله إزاز وناس لابسة شيك، نزلوا وقربوا من ترابيزة كبيرة، كانت قاعدة عليها بنت شقرا جميلة جداً ولابسة فستان ملفت وقصير، وكان قاعد جنبها راجل عجوز شكله أجنبي. فارس قرب منهم وسلم عليهم بثقة وعرفهم على أمل وقال لهم: "دي الآنسة أمل، المساعدة بتاعتي" أمل قعدت جنب فارس وهي متوترة وقلقانة، مش عارفة تقول إيه.. حاسه إنها غريبه على الأجواء دي. فارس طلب لنفسه قهوة.. وطلب ل أمل عصير عشان تهدى. وبدأ الاجتماع وفارس كان بيتكلم مع الرجل العجوز في تفاصيل كتير تخص المشروع اللي بيتفقوا عليه. أمل كانت بتراقبهم وهما بيتكلموا، فهمت إن الراجل العجوز يبقى أبو البنت الشقرا إللي قاعدة جمبه.. وعنده شركة برا مصر وعايز فارس يشاركه في مشروع جديد بين الشركتين. البنت الشقرا كانت عيونها على فارس طول ما هو بيتكلم، بتبص له بإعجاب واضح ومش شايلة عينيها من عليه، وأمل خدت بالها من أول ما قعدوا، وقلبها اتقبض وكانت حاسه من جواها بغيرة بتاكل فيها وهي مش فاهمة بتغير ليه، كانت بتلوم نفسها وبتقول في سرها؛ هو إيه حكايته ده ؟.. شكله بيفرح بلمة الستات حواليه.. واحدة في الشركة المفروض خطيبته.. ودي هيعمل معاها مشروع وعيونها هتطلع عليه.. شكل الستات حواليك كتير يا فارس الحريري.. وانا اللي عبيطه وكنت هصدق انك ممكن تحبني! فارس لاحظ شرودها، عينيها كانت تايهة وبتبص على البنت الشقرا اللي مش شايلة عينها من عليه، ابتسم ومد إيده وحركها قدام عينيها بخفة عشان يفوقها: "روحتي فين؟" أمل فاقت من شرودها وقالت: "انا موجودة معاكم" فارس ابتسم وسألها بهدوء: "طب تحبي تاكلي إيه؟" أمل اتكسفت جداً ووشها احمر، لإن فارس كان بيتعامل كأنها بنته، مهتم هتشرب إيه وهتاكل إيه، بيطلب لها العصير وبيسألها تاكل إيه، وفي نفس الوقت كان مركز في الاجتماع وبيتكلم بالأرقام والمشاريع بمنتهى الثقة. ردت أمل بخجل: "أنا مش جعانه شكرا " البنت الشقرا بصت ل أمل بحقد وسألت فارس بغيظ: واضح ان العلاقة بينكم اكتر من مساعدة شخصية ؟ فارس بص لها بثقة وقال: خلينا نتكلم في الشغل احسن. البنت اتكسفت من رده. وأمل اتوترت آكتر وكانت قاعدة جنبه معملتش أي حاجة وكانت حاسه ان وجودها مالوش أي لازمة في القاعدة كلها، فارس هو اللي بيتكلم وهي كانت قاعدة زي الكرسي، لا فاهمة حاجة ولا بتعمل حاجة، وبتسأل نفسها هو جابني هنا ليه أصلاً؟ الاجتماع خلص.. البنت قامت تسلم على فارس وقربت منه أوي وهي بتهمس له بإغراء: "أتمنى إن الاجتماع الجاي يكون خاص.. أنا وانت بس" أمل فتحت عينيها بصدمة وكحت جامد أول ما سمعت كلام البنت مع فارس، كانت حاسه إن الكلمة وقفت في زورها. فارس ابتسم لها بمجاملة باردة وسلم على والدها. بعد ما مشيوا.. كانت أمل واقفة مصدومة بعد اللي سمعته، وشها كان أحمر ومش عارفة تبص لفارس. فارس كان عارف إنها سمعت جملة البنت.. ابتسم وقال لها: "اقعدي.. نشرب قهوة قبل ما نرجع الشركة." كان فاهم إن أمل بقت خايفة منه بعد الجملة اللي سمعتها من البنت وممكن تشك في أخلاقه. اتكلم فارس بدون مقدمات : " أنا مبحضرش اجتماعات خاصة على فكرة." أمل وشها كان أحمر أوي ومكانتش عارفة ترد. فارس ابتسم وقال: أنا بفكر أرفض المشروع بتاعهم ده إيه رأيك؟ ردت أمل بسرعة: "اه طبعا لازم ترفضه" فارس بص لها أوي وقال: "لازم أرفضه ليه؟" اتكلمت أمل بعصبية وهي مش واخدة بالها، كانت حاسه بغيرة مولعة في قلبها: "لأن هما مش هدفهم مشروع.. البنت دي عايزاك انت" فارس ضحك وقال لها: "برافو عليكي.. مكنتش متوقع إنك بالذكاء ده كله وهتقدري تفهمي هما هدفهم إيه" ردت أمل ببساطة: "الموضوع مش محتاج ذكاء على فكرة.. البنت عينيها كانت هتطلع عليك.. ومعندهاش احترام حتى لباباها اللي قاعد جنبها" فارس ضحك من قلبه وبص لها أوي.. وقال: "هو انتي اضايقتي منها؟" أمل حست إنها كشفت غيرتها عليه أوي وقالت بارتباك: "لا عادي.. بس المفروض احنا جايين نتكلم في شغل" شرب من القهوة بتاعته وقال بهدوء: "عندك حق" أمل قالت بتوتر: "هو احنا مش هنرجع الشركة بقى؟" رد بهدوء: "هخلص القهوة ونتحرك على طول" أمل كانت متوترة من نظراته، كانت حاسه إن عينيه مش بتفارقها. فجأة تليفونها رن. كان رقم واحدة جارتهم. ردت عليها بقلق. الست قالت لها.. "الحقيني يا أمل يا بنتي.. كنت داخلة أطمن على أمك ولقيتها تعبانة أوي.. تعالي بسرعة الحقينا" أمل قامت بسرعة وهي خايفة على مامتها. فارس سألها في إيه وهي ردت عليه بسرعة وهي بتبكي.. "ماما تعبانة أوي" فارس قام معاها بسرعة وخدها في عربيته وراحوا على الحارة بتاعتها. عباس بلطجي المنطقة كان واقف هو وكام واحد من الصبيان اللي مشغلهم. شاف عربية غالية دخلت المنطقة. رمى السيجارة اللي في إيديه وقال: "استنى ياض انت وهو لما نشوف مين النضيف اللي جاي الحارة في عربية غالية ده" وفجأة شاف أمل وهي نازلة من العربية بتجري على بيتها وهي بتبكي. وفي شاب غني وشكله باشا.. نزل هو كمان من العربية ودخل وراها البيت. عباس قال بصوت غليظ: "هو في إيه يا رجالة.. هي الحارة دي ملهاش كبير ولا إيه؟! مين اللي جاي مع الحتة بتاعتي ده" واحد من صبيانه قال بتريقة: "حتة بتاعتك إيه بس يا معلم.. شكل الحتة بتاعتك اتعلقت بالباشا صاحب العربية وخدها منك" عباس اتعصب وقال: "مين ده اللي ياخدها مني ياض.. هتشوفوا أنا هعمل فيه إيه دلوقتي" واتجه عباس ناحية بيت أمل. رواية الكاتبة ملك إبراهيم جوه البيت. باب الشقة كان مفتوح ووالدة أمل كانت غايبة عن الوعي.. والست جارتها كانت قاعدة جنبها. أمل مسكت إيد والدتها وهي بتحاول تفوقها وكانت بتبكي وبتنادي عليها بصراخ، كانت حاسه بروحها بتتسحب منها. فارس لما لقى الحالة كده.. اتصل بسرعة بالإسعاف. دخل عباس وهو بيتكلم بصوت غليظ: "هي الحارة دي مفيهاش رجالة ولا إيه؟ جرى إيه يا ست أمل.. جاية جري كده وجايبة راجل وراكي ولا همك حد" فارس بص له بغضب ووقف قصاده سد عليه طريق دخول الشقة وقاله: "وانت مين بقى؟" رد عباس بفخر: "أنا عباس.. كبير المنطقة دي كلها وكل اللي فيها عايشين تحت حمايتي" فارس افتكر كلام أخته دنيا عن عباس البلطجي اللي كان عايز يتجوز أمل وبيضايقها في الرايحة والجاية.. بص له بغموض وقاله: "انت بقى عباس" رد عباس بثقة: "وانت بقى تطلع مين يا باشا؟"... بقلمي ملك إبراهيم... يتبع في الجزء الرابع

حكاية امل وفارس

ملك ابراهيم

اترك تعليقاً إلغاء الرد

مقالات ذات صلة

تركتني أمي في محطة القطار حكايات ميدو

رجعت من السفر لقيت مراتي مغمى عليها

ذات مره حكايات ميدو

ضحيت ب 22 سنه حكايات حماده

مأساة عريس ټو.في بعد زفافه بـ13 يوما:

هذه الطفلة برفقة العندليب أصبحت من أشهر نجمات الوطن العربي بصوتها العذب.. شديد الملاحظة سيعرفها؟!!

اترك تعليقاً إلغاء الرد