تالت يوم بعد دفن ابويا

تالت يوم بعد دفن أبويا ، أخويا جاب سمسار عشان يبيع البيت من ورا ضهري وكان مستعجل يخلص كل حاجة قبل ما حد من أهل البلد يعرف لكن أول ما الراجل وصل ووقف قدام الباب ، اتجمد مكانه وهو بيصرخ يا ساتر يا رب

بصيت قدام رجلي. لقيت ثعبان ضخم ممدد على عتبة البيت ، لا بيتحرك ولا بيهاجم حد. أخويا اتعصب ومسك عصاية وهو بيقول ده يومه قبل ما يكون يومي.. لكنه مكنش يعرف إن بعد ما الثعبان هيتحرك بدقايق هنكتشف حاجة خلت أخويا يقع على ركبته قدام البلد كلها ويتمنى لو عمره ما فكر يبيع البيت ده

أنا اسمي هناء عندي اتنين وعشرين سنة ومن يوم ما فتحت عيني على الدنيا وأنا مليش غير أبويا. أمي ماتت وأنا لسه صغيرة ومن ساعتها وهو عاش عمره كله يحاول يعوضني عن غيابها لا عمره خلاني أحس إني يتيمة ولا يوم دخل عليّ وأنا زعلانة إلا وخرجني من همي بكلمة طيبة أو ضحكة من قلبه وكان دايمًا يقول لي وهو بيقفل باب البيت كل ليلة البيت ده هو آخر ضهر ليكي في الدنيا أوعي تفرطي فيه مهما حصل.

بيتنا مكنش كبير ولا كان قصر زي بيوت الأغنيا ، كان بيت فلاحي بسيط في آخر الشارع ، مبني بالطوب الأحمر ، قدامه شجرة جميز كبيرة زرعها أبويا بإيده يوم اتجوز أمي وكل ركن فيه كان شايل ذكرى من عمره ، لدرجة إن ريحته كانت بتطمني أكتر من حضن أي حد.

لكن أخويا الكبير حسام اللي المفروض يكون سندي بعد وفاة أبويا كان شايف البيت بعين تانية خالص عين مبتشوفش الذكريات ولا تعب السنين ولا وصية أب راحل كانت بتشوف كام متر أرض وكام جنيه ممكن يدخلوا جيبه.

العزاء بالكاد خلص ولسه الناس بتقرأ الفاتحة على روح أبويا ، لقيته داخل عليّ الصبح ، قعد قدامي وقال وهو بيقلب مفتاح البيت بين صوابعه وكأنه بقى صاحبه الوحيد اسمعي يا هناء البيت ده هيتباع.

افتكرت في الأول إنه بيهزر أو إن الحزن لخبطه فضحكت وأنا بقول له يتباع إيه؟! ده بيت أبويا.

رد عليا بمنتهى البرود ، كأن اللي مات واحد غريب عنه وأبوكي الله يرحمه مات والحي أولى من الميت. أنا خاطب بقالي سنتين وكل يوم الأسعار بتزيد والبيت ده تمنه يجيبلي شقة محترمة أتجوز فيها بدل البهدلة.

الكلام نزل على قلبي كأنه حجر وقلت له وأنا حاسة إن نفسي بيتقطع وأنا هروح فين؟

قالي وهو بيهز كتفه بمنتهى اللامبالاة تبقي تيجي تعيشي معايا أنا ومراتي أو نشوف لك أي حل بعدين.