في حفلة عيد ميلاد جوزي
كان فيه سر أكبر مستخبي وراه. عمي سامح قرب وقال:”أبوكي كان عنده سبب يخلي الموضوع ده سر.”صرخت:”سبب إيه؟! أنا اللي حياتي اتدمرت وأنا آخر واحدة تعرف!”عمي سكت. يحيى قال:”كفاية.”بصيت له:”كفاية إيه؟”قال:”مش هنا.””أمال فين؟””في المكان اللي أبوكي كتب عنه.
“رائد فهم:”المخزن.”يحيى هز راسه.”هنروح هناك.”قلت:”وأنا جاية.”قال:”لا.”صرخت:”فارس هناك!”رد:”وعشان كده مش هخليكي تيجي.”قلت:”لو حد فيكم حاول يمنعني، هروح لوحدي.”يحيى بصلي فترة طويلة، وبعدها قال:”خلاص.”رائد اتفاجئ:”يحيى!”قال:”هتيجي… بس هتفضلي في العربية.”بصيت له:”مش هقدر أوعدك.
“ابتسم رغم توتره.”كنت عارف.”خرجنا من الفيلا بسرعة. قبل ما أركب، عمي سامح وقفني. قال:”داليا.”بصيت له. مد إيده بحاجة صغيرة. مفتاح قديم.”لو حصل أي حاجة… افتحي الباب الحديد اللي ورا المخزن.”سألته:”إيه اللي جواه؟”قال:”الحقيقة.”ركبت العربية. طول الطريق محدش اتكلم.
كان كل واحد فيهم غارق في أفكاره. وأنا كنت ماسكة السلسلة في إيدي. الشريحة الصغيرة كانت جواها، كأنها شايلة سر عمره سنين. بعد حوالي ساعة، وصلنا لمنطقة صناعية قديمة على أطراف القاهرة. المكان كان شبه مهجور.
مخازن مقفولة، مباني متهالكة، وطريق ضيق مافيش فيه غير كام عربية نقل معدية كل شوية. شادي بص للموقع.”العربية هنا.”يحيى أشار لنا نوقف.”انزلوا.”نزلنا كلنا. بصيت للمخزن. الباب الحديد كان مفتوح نص فتحة. يحيى رفع إيده.
“محدش يدخل.”فجأة سمعنا صوت خبط من جوه. صرخت:”فارس!”جريت ناحية الباب. يحيى مسكني.”استني!”لكن صوت فارس جه واضح:”داليا!”حاولت أفلت إيدي.”فارس!”صوته رجع:”ماتدخليش!”يحيى فتح الباب بحذر. دخلنا. كان المكان ضلمة، وفيه لمبة واحدة معلقة من السقف. وفارس كان مربوط في كرسي في نص المخزن.
أول ما شافنا، صرخ:”ارجعوا!”وفي نفس اللحظة، سمعنا صوت تصفيق من آخر المكان. ظهر الراجل اللي كان في الحفلة. كان واقف جنب عمود خرساني، وفي إيده مسدس. قال:”كنت متأكد إنكم هتيجوا.”يحيى وقف قدامنا.”سيب فارس.”الراجل ضحك:”هو مش هدفي.”بص لي.”إنتي الهدف.”قلت:”عايز إيه؟
“قال:”الشريحة.”رفعت عيني له.”مش معايا.”ابتسم.”معاكي.”رائد اتحرك، لكن الراجل رفع المسدس ناحية فارس.”خطوة واحدة وهيمو. ت.”وقف رائد مكانه. الراجل قال:”حطي السلسلة على الأرض.”بصيت لإخواتي. يحيى هز راسه بالنفي. الراجل قال:”يلا يا داليا.”حطيت إيدي على رقبتي.
